Академия Бас прокуратурамен және жекелеген қалалық, аудандық прокурорлармен бірлесіп, тағылымдамадан және қызметтен өтуге байланысты прокурорларға жүктелетін міндеттер туралы білімді кеңейту мақсатында тыңдаушылар үшін кездесу ұйымдастырды.
Іс-шараны ашқан Академия проректоры Маралбек Ешимов биылғы жылы прокуратура органдарына қызметке кіретін адамдар үшін алғашқы кәсіптік даярлыққа іріктеу және оны өткізу шарттарының қағидаларына енгізілген түзетулер туралы түсіндіріп, білім беру процесіне енгізудің маңыздылығын атап өтті.
Спикерлер ретінде Кадр жұмысы департаменті бастығының орынбасары Айбар Ілияс және Бас Прокурордың аға көмекшісі — Идеологиялық, тәрбие және психологиялық жұмыс жөніндегі топтың жетекшісі Ернур Уали прокуратура органдарында Әдеп кодексінің, идеологиялық және тәрбие жұмысының талаптарын түсіндіре отырып сөз сөйледі.
Бас Прокурордың аға көмекшісі — Жеке қауіпсіздік департаментінің топ басшысы Арсен Марат прокурорлардың қадағалау қызметіндегі сыбайлас жемқорлыққа қарсы шектеулерді жария етті және прокуратура қызметкерлерінің тәртіптік, әкімшілік және қылмыстық жауаптылықтың әртүрлі түрлеріне тартылған қызмет өткеруді бұзудың нақты фактілері бар бейнероликті көруге ұсынды.
Сондай-ақ Қарағанды қаласы Қазыбек би атындағы ауданының прокуроры Арман Аханов, Астана қаласы Байқоңыр ауданының прокуроры Арман Қозбаев және Қосшы қаласының прокуроры Данияр Ізбасаров тағылымдамадан өту және қадағалау қызметінде жас қызметкерлерге қойылатын негізгі талаптар туралы түсіндірме сөз сөйледі.
Қалалық прокурорлар тыңдаушылар алдында сапалы теориялық және практикалық дайындықтың, сондай-ақ қадағалау қызметінде ақпараттық жүйелерді пайдаланудың қажеттілігіне ерекше назар аударды.
Бейнеконференцбайланыс арқылы қатысқан Қостанай, Павлодар, Солтүстік Қазақстан, Ұлытау облыстары аудандарының прокурорлары әріптестерінің пікірлерімен келісіп, талқыланатын мәселе бойынша толықтырулар енгізді.
Кездесу қорытындысы бойынша Бас прокуратура өкілдері тыңдаушылардың әлеуметтік қамсыздандыруға, тағайындау және басқа өңірлерге ауыстыру тәртібіне қатысты сұрақтарына толық жауап берді.
Жалпы, Академия Бас прокуратурамен бірлесіп осындай іс-шараларды тұрақты негізде өткізуді жоспарлап отыр.
Құқық қорғау органдары академиясының
баспасөз қызметі
