Құқық қорғау органдары академиясында Халықаралық әйелдер күні мерекесіне арналған салтанатты іс-шара өтті.
Академия қызметкерлері, оқытушылары және білім алушыларына құттықтау сөзбен Академия ректоры Нұрғалым Әбдіров сөз сөйледі.
Өз сөзінде ректор әйелдердің оқу орнының дамуына және жалпы құқық қорғау жүйесіне қосып отырған ерекше үлесін атап өтті. Оның айтуынша, қызметкер әйелдердің кәсібилігі, парасаттылығы, жасампаз энергиясы мен іске деген жауапкершілігі Академияның білім беру, ғылыми және ұйымдастырушылық қызметінің дамуына елеулі үлес қосуда.
Ректор сондай-ақ Академия әйелдері құқық қорғау органдарының болашақ қызметкерлерін даярлау, ғылыми зерттеулер жүргізу, халықаралық ынтымақтастықты дамыту және оқу орнының беделін арттыру бағыттарында табысты еңбек етіп жүргенін атап өтті. Сонымен қатар, мекеменің ұйымдастырушылық және әкімшілік жұмысының тұрақты жүргізілуін қамтамасыз етіп отырған қызметкер әйелдердің еңбегіне ерекше назар аударылды.
Нұрғалым Әбдіров барлық әйелдерге адал еңбегі, мамандыққа деген беріктігі және Академияның дамуына қосқан үлесі үшін шынайы алғысын білдірді. Сондай-ақ білім алушылар қатарындағы нәзік жанды тыңдаушыларды, магистранттар мен докторанттарды құттықтап, оқуларын табысты аяқтап, алға қойған мақсаттарына жетулеріне тілектестік білдірді.
Салтанатты іс-шара барысында Академия қызметіне елеулі үлес қосқан бірқатар қызметкер әйелдер марапатталды. Мерекелік атмосфера концерттік бағдарламамен жалғасын тапты.
