Ағымдағы жылғы 10 желтоқсанда ТМД-ға қатысушы мемлекеттердің Сыртқы істер министрлері кеңесінің онлайн-отырысында Қазақстан Республикасы Бас прокуратурасының жанындағы Құқық қорғау органдары академиясына ТМД-ға қатысушы мемлекеттердің прокуратура органдарының прокурорлық – тергеу қызметкерлерін қайта даярлау және біліктілігін арттыру жөніндегі базалық ұйым мәртебесін беру туралы шешімге қол қойылды.
Жаңа мәртебе оқу орнының жетістіктерін мойындау болып табылады және Достастық елдерінің прокуратура органдары арасында қылмысқа қарсы күресте, құқықтық тәртіпті қамтамасыз етуде, адам мен азаматтың құқықтары мен бостандықтарын қорғауда практикалық тәжірибе мен білім алмасу мүмкіндігін кеңейтеді.
Бұл прокурорлық-тергеу қызметі саласындағы жаңа білімдердің бірыңғай ақпараттық-талдау базасын қалыптастыруға мүмкіндік береді, сондай-ақ ТМД сарапшылары мен мамандарын тарту мәселелерінде қылмыстық қудалау органдарына жәрдемдесу мүмкіндігін кеңейтеді.
Базалық ұйымның негізгі функциялары біліктілікті арттыру; ғылыми және оқу-әдістемелік материалдармен алмасу; ТМД – ға қатысушы мемлекеттердің жоғары оқу орындарының өзара іс-қимылына, оқу процесіне қазіргі заманғы, инновациялық әдістер мен нысандарды енгізуге ортақ тәсілдерді тұжырымдау және жәрдемдесу болып табылады.
Бұл мәртебе ТМД-ға қатысушы мемлекеттердің прокурорлық-тергеу жұмыстарын құру және тиімді дамыту үшін бірлескен халықаралық іс-шаралар мен ғылыми зерттеулер жүргізуге ықпал ететін болады.
Академия 2017 жылдан бастап Орталық Азиядағы жаһандық қатерлерге қарсы іс – қимыл саласындағы өңірлік хаб және 2018 жылдан бастап салықтық (қаржылық) тергеу органдары үшін кадрлардың біліктілігін арттыру және қайта даярлау жөніндегі ТМД-ға қатысушы мемлекеттердің базалық ұйымы болып табылатынын атап өткен жөн.
